مرحبا بك عزيزي الزائر. المرجوا منك أن تعرّف بنفسك
و تدخل منتدى ملتقى ابناء الدويم معنا. إن لم يكن لديك حساب
بعد, نتشرف بدعوتك لإنشائه
منتدى الدويم
مرحبا بك عزيزي الزائر. المرجوا منك أن تعرّف بنفسك
و تدخل منتدى ملتقى ابناء الدويم معنا. إن لم يكن لديك حساب
بعد, نتشرف بدعوتك لإنشائه
منتدى الدويم
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
منتدى اجتماعي ثقافي
الدخول
أهلا وسهلا بك زائرنا الكريم إذا كانت هذه زيارتك الأولى لمنتدى الدويم يشرفنا أن تقوم بالتسجيل بالضغط هنا ، أما إذا كنت أحد أعضاءنا الكرام فتفضل بتسجيل الدخول بالضغط هنا . لو رغبت بقراءة المواضيع و لإطلاع فقط فتفضل بزيارة القسم الذي ترغب أدناه.
موضوع: يوميات الاشتر الأحد سبتمبر 07, 2014 8:40 pm
الأشـــتر وحـــقن الكـــلب ________________________________________ الناس كلها ياكافي البلاء تشكي وتجض من درب دكان عمر ود عبدالرحيم باقي ناس العاقب عندهم كلباً باقي للناس في رقبته ومجبورين على الدرب ده عشان الدكيكين الفيهو اليسمع يقول (عفراء مول) .. وعمر ود عبدالرحيم سيد الدكان عشان الكلب والناس قلت من الجيه ليهو بقى يبيع {بالجرورة} وخاتي الدفتر قدام الدكان متل (كشف العرس) .. وناس العاقب قدر ما شكولن من الكلب حقهم قالوا بحميهم من الحرامية {التقول أولاد البرير} خايفين على الدهب والقروش قالوا .. وفي يوماً أسود من حظي ده .. مفلس وواقع لي الله في يدو .. ماعندي التكتح والدنيا ليلت تب أمي قالت لي جيب لينا {زيت ونص رطل سكر وبن} من الدكان .. ومو خابره إنو جيبي بنى فوقو العنكبوت (فيلا فاخرة) .. بس خجلت أقول ليها ما عندي قروش قلت أمش لي الدفتر حبيبي .. بس كمان أنا كورهتي في الدينا {الكلب .. والجلابية القلباية} بس أسوي شنو قلت أمش وفي نص الدرب لقيت ليك أمونة بت عبدالعظيم جارية جري {تقول موسى الزومة} وتكورك والكلب ساكيها (التقول مسيرين ليهم طيش) .. وانا أكت قربت ليها قالت لي الحقني يا الأشتر .... وأنا في خاتري كايس البلحقني ويفزعني ..لكن المرة لسانها طويل وبتشيل حالي في الحلة .. أها عملت فيها طرزان وجريت على الكلب قلت أكان يهرش مني ويرجع وأنا جاري عليهو وهو جاري علي .. أها أنا وقفت .. أنقروا هو وقف ؟؟.. ما جاء جاري علي بنمرة أربعة .. وقال كدي ونطه في يدي (وقرمه) ليك ودمي قدر الفي جاء طاير .. وأنا عليك أمان الله قلت ما أخلي حقي وأجري ليك فوقو لمن طير عويناتنو وقال {الزول ده جنه ولا شنو؟} وأمسك الكلب وأعضيهو ليك في رقبته وأفكه .. وقام جاري ويتلفت وراهو كأنو ساكيهو رباطي .. أها رجعت البيت وغسلت العضة بي ليمون وملح وقرض . وغلبني النوم والليل كلو اليد تنتح متل (ضهر القعويه) .. وصبحت الصباح اليد مورمة ووزادت في النتحي قلت أخير أمشي الشفخانة وأشوف لي علاج .. أخونا الحكيم قال لي إلا الحقن مافي علاج غيرها .. والحقن في {خرتوم الجن} بس .. هنا مافي .. ما بتصل الأقاليم .. التقول الأقاليم ما فيها كلاب بتعضي ولا فيها ناس بتعضو .. وجيت الخرتوم أكوس للحقن من إستبالية لي شفخانة لي إجزخانة .. غايتو لقطهم تمنية حقن بالسعر الأسود والمباصرة شيتن من سوق {ستة} وشيتن من سوق {التقاطع} وشيتن من الممرضات .. ورجعت الحلة عليك أمان الله سووا لي إحتفال تقول جبت ليهم (تركتر) .. أهان وبديت أخد الحقن .. أها أخونا الحكيم قال لي أخد التمنية ديل وبعد داك الكلب أكان مات إلا تتمهن أربعة وعشرين حقنة وإن ما أخدتهن ياكه السعرت متل الكلب وعمرك قصر .. أها أنا قلت في بالي : أسي الكلب أكان مات .. والحقن ماني لاقيهن تاني .. أها أقعد أهوهو وأسعر والله مصيبتك ياالأشتر يعزوك فيها .. والكلب ده أكان مات قضاء وقدر ساي برضو ناس الحلة ما بخلوني بشيلو حالي ويقولو الأشتر سعر وتاني يخلو لي الدرب عدييل ... دحين إلا الكلب ده أراقبو واشوف أحوالو لحدي ما أتم العشرة يوم ديل ... قمت مشيت للعاقب وقلتلو كلبك ده أنا بشيلو منك العشرة يوم دي ويكون عندي في الحفظ والصون وبرجعو ليكم سالم غانم .. جهزت ليه شبكاً لليل حديد وشلته الكلب للبيت .. ووحاتكم السويتو للكلب ما سووهو لي {مره نفساء} .. ما خليت ليهو مديدة ولا كبدة محمرة ولا لبن مسخن .. جنس دلع .. وهو ما مطمني كل يوم ماشي في نازل .. وأنا همي ماشي في زايد .. وبعد تسعة يوم والدنيا صباح أجيب ليك اللبن المسخن أكان ألقالك الكلب ميت .. أها وأضرب ليك الكوراك والجرسة ويسمعني صلاح ودعمي ويجي جاري . ويشوف الكلب مجندل ميت .. أها قال لي نشيل الكلب ونمش حكيم الشفخانة يحللو ويشوف سبب الموت شنو .. شيلنا مصيبتنا ومشينا الحكيم .. أها والنصيبة الكبيرة أشوفلك صلاح باعد مني كدي وخاتي زي خمستاشر متر فرق بيني وبينو ومتوكد تب إنو الأشتر بقى كلب حلة .. ووصلنا والدكتور أخد عينات من الكلب وقال تعالو بعد ساعة .. والساعة دي وحات الخالق شفتها أطول ساعة في العمر .. المهم بعد شوية الحكيم جاء مارق من جوه .. وقال لنا : والله أجماعه أبشركم الحمد لله الكلب طلع ما سعران.. إلا الموتة دي سببها عضتك ياالأشتر الفي رقبتو عملت ليهو تسمم شديد وكتلتو ..
ومن اليوم داك وأنا مقدم أوراقي وخبرتي لوزارة الصحة لوظيفة {كتال كلاب}