مسدار الي اهلي في كردفان

10/03/2010

فارِسْــــــــــنا الكلسْ البلكرمْ معروف
كرمَـكْ في الرَّجــــــالْ باينْ دوام مألوف
ما بتخشى الفَقُرْ حاشاكْ تعرف الخوف
يوم النار تبقْ تهجـــــمْ عديل مكشوف
***
بهديك التحيَّه الما بتكفي ثنــــــــــــــاكَ
يا ابْحِجْلاً برصْ كلَّ الخلوقْ جايـــــــــــاكَ
ما تضاريتْ مرقتَ الناسْ بقتْ في ضراكَ
من طيبْ الحديـثْ عطَّرْ ربانا شــــــذاكّ
***
يوم دقَّ النحاسْ بارودنا سَــوَّا سحابه
والفرسانْ تصـولْ في الحاره ما بتتغابه
خاضوها أم لهيــبْ جنياتنا نتفاشــابا
ثابتين كالجبالْ فرســانْ دُواسْ وحرابه
***
نهجم من دِغيــشْ في عتمةْ الفجريَّه
بنخوضْ أم صِقيرْ ..شــافعنا بوزن ميَّه
نوطاهُو الجَمُرْ .. نَســـتاكْ زخِيرةً حيَّه
نفديها القيمْ وارواحْـــــنَا شانها هديَّه
***
والداير الســـــــــــــلامْ بلقَانا عهدْ وأمانه
نتوَاثقْ صِدِقْ واللهِ مافي خِيَــــــــــــــانه
نُسْكِتْ للمــدافعْ ونُخْرسْ الجبخــــــــــانه
في شانْ السـلامْ راياتو فوقْ لي سمانا
***
مرحب بالجنــوبْ والحــــــــرب الله يزولها
مرحب بالشمـــالْ الباوقه جاريه سهولها
مرحب بالشرقْ ناس دقنه تروي بطوله
مرحب بالغربْ مَردُومْ وتُويَه وفــــــــــوله
***
مرحب كردفـــــــــــــــــانْ والله ما ناسيكي
كيف أنسى الدلالْ أنسى السماح الفيكي
ما يوتْ في حَشَـــــــايْ قايلاني ما طاريكي
بهــواكْ كـــــــــردفان وكتينْ يفيض واديكي
***
مشـتاقْ لي الرِّمــالْ لي فُونْقَةَ الحبَّان
ومشتاقْ للبريقْ يشـــلعْ على الوديان
ويا حليلْ القمــــــــــــــاري تذَكِّرْ الخلَّان
بي جيْةَ الحبيبْ في الغُـربه ليـهو زمان
***
مشـتاق للهَرَعْ شايلو العِشِقْ لي غادي
ومشتاقْ للدعــــاشْ نَسَّمْ جنوب الوادي
ومشتاقْ للحبيبْ وكتينْ عليَّ ينـــــــادي
بالذوقْ الرَّفيـــعْ جدَّدْ عليَّ سهــــــــادي
***
مشتاقْ للمُزُنْ جهــةَ الصعيدْ ماطرني
ومشتاقْ للنسيــمْ وكتين يطِلْ عابرني
بهواكْ كردفــانْ كلَّ الجمال ساحرني
شان سِحْرِكْ غَلَبْ جُوايْ صِبِحْ جابرني
***
ديل أهَــــــــــلِكْ عُزازاً بالكرمْ إتحلُّوا
حين يحمى الوطيـــسْ واللهِ ما بتذلُّوا
ناسْ قدحاً كبيرْ كِتْرَ الضيـــوفْ أو قلُّوا
ديـــــــلْ ناسْ الذِّكرْ لا كلُّو تَبْ لا ملُّو
***

يا أهلي وعشيرتي ناس كردفان ...
وهاكم مني هذه القصيده التي جسدت فيها كردفان ...الخلاوي ... والكرم والجود ... والفزعة ...
أهلي الزينين .....

كَلامِكْ يُمَّه

شعر / محمد زين العابدين أبوجديري

بِذَكَّرْ كَلامِكْ يُمَّه ليَّ زمان
بَدُورَكْ شامَه فوق النَّاس
تجِيبْ دَاعِي الإلَهْ مُسْرَاع
وتتَوشَّحْ لباسَ التَّقوَى والإيمان
بَدُورَك في العِلِمْ والشَّان
دوام تتوسَّط الحلقَاتْ
وفي شان القيام باللّيلْ
تفُوتْ تُمْرُقْ مَعَ الحِيرانْ
تنُطْ السِّيسَه مِنْ غَادِي
وتجِيبْ الفَزْعَه لي تُقابَة القُرآنْ
وتتحَكَّرْ !!!
تقُولْ بسْمِ الله يا أحباب
وتبدا الرَّمْيَه بالرَّحمنْ
تشَرِّفْ للحُوَارْ يس ..
فُوقْ لُوحَاً كبِيرْ وعريض
دَوَايْةً سُودَه ضُلْمَةْ لِيلْ
يقوم فَرحانْ ..
على الدُّكانْ ..
يجيب مِدّ البَلَحْ مَليانْ
يجدِّعْ فيهُو للحِيرَانْ
كَرَامْةً شان تطُرْد الشَّرْ
يزِيدْ الخير ويَرْبَى كمانْ
يجُو الاخْوان !!
ومن فُوق الصَّريفْ تَسْمَعْ
مبروك الشَّرَافَه آوْلِيدْ
عُقْبَالْ سُورَةَ الفُرقانْ
نجِيكْ بالتَّاني في العُودَه
بعد ما تختِمَ القُرآنْ
بَدُورَكْ في الشَّهَامه أصِيلْ
ووكت الهَجْعَه نُصَّ اللِيلْ
تكُونْ في زُمْرَة الفِرسانْ
ومُتْقَدِّم !!!
تَسَابِق لي صَهِيل الخيلْ
وللمَلهُوفْ تقوم عَجلانْ
بَدُورَكْ قِبْلَة الضِّيفانْ
زُولْ قَدَحاً كَبِيرْ بالحِيلْ
تحلِفْ في الكَرَمْ والجُودْ
تحَرِّمْ بالتَّلاتَه عَدِيلْ
تفُوتْ كِكَّيفْ ؟؟؟
عِيبْ واللهِ ..!!
كان بتفوتنا بعد اليوم
نَكُونْ مَا اهْلَ الْكَرَمْ والضِّيفْ
وكان بتفوتنا بعد اليوم
نَكُونْ مَا نَاسْ القْرَافْ
مليَانَه رَاجْيَه الصيفْ
وكان بِتْفُوتْنَا بعد اليوم
نَكُونْ مَا نحْنَ ..
شَانْ نَجْدَةْ غَرِيقْ
بيَّتْنَا فُوقَ الْقِيفْ
تَفَضَّلْ جُوَّه لي قِدَامْ
حَبَابَكْ ..إسْتَرِيحْ لا تْقِيفْ
هَا بْنَيَّاتْ .. أمُرْقَنْ جَا
عَلَى النِّيرانْ ..
على المُرْحَاكَه والصِّيجانْ
أمُرْقَنْ لا يقوم الضِّيفْ
هَا وْلِيدَاتْ !!!
ألحَقُوا بَالمْرَاحْ في العُقْدَه
جِيبُو التُّورْ ..
عَجِّلُوا !!
بِنْشُوف السَّحَابْ زَرْقَنْ
غُبَارَاً قَامْ ..
صَبَاحْ قِدَّامْ ..
عَجِّلوا !!!
لا يجِينَا خَرِيفْ
عَجِّلوا !!!
لا يَقُوم الضِّيف

الموضوع الأصلي : مسدار الي اهلي في كردفان المصدر : منتدى الدويم

محجوب عفيفي; توقيع العضو